KALIBO, Aklan—Excited eon ro Filipino community sa Indonesia sa nakataeanang pagbisita idtu ni President Ferdinand “Bongbong” Marcos Jr. sa domingo nga adlaw, Setyembre 4.
Suno kay Bombo International Correspondent Elaine Mercado it Jakarta nga may sangka grupo it BBM supporters ro masako makaron sa pagahiwaton nga meet and greet it pangueo.
Mag-eowas kara, padayun man ro pag engganyo it Philippine Embassy sa Jakarta sa mga Pinoy nga magtambong sa nasambit nga pagtililipon.
Ginpahayag ni Mercado nga nagbukas ro embahada it online registration portal agud nga makapa-rehistro ro mga interesadong Pilipino.
Kinahangean sigon nga ibutang ro andang personal information, passport number, ag contact details.
Ro aplikante hay magabaton it confirmation notice pinaagi sa email halin sa embahada.
Ginaeauman it mga Pilipino nga mabatian kay Marcos ro mga manami nga balita angot sa ekonomiya it Pilipinas partikular ro investment opportunities sa mga overseas Filipino workers engkaso nga magdesisyon sanda nga mag uli eon sa Pilipinas.
Kaeabanan sa mga OFWs sa Indonesia hay mga ex-pat nga gin-hire agud nga maging teacher sa mga international schools, accountant sa mga mabahoe nga kompaniya ag iba pang trabaho nga nagabaton it mataas nga sweldo.
Pagkatapos it Indonesia hay magatabok sa Singapore ro pangueo.
Raya hay sangka tikang agud mapabilin ro tradisyon it mga Pangueo it Pilipinas nga magpili it maskin anumang Southeast Asian nation para sa andang unang biyahe sa guwa it nasyon.
