KALIBO, Aklan—Gintuldukan ni former governor Florencio “Joeben” Miraflores ro pilang haka-haka nga magaretiro eon imaw sa pulitika.
Raya hay matapos nga nagdihon imaw it anang certificate of candidacy agud nga makapadaeagan bilang congressman sa ikaywang distrito it Aklan sa ulihing oras it pagfile it certificate of candidacy sa Audio-Visual Room it Aklan State University nga ginhimong venue it provincial Comelec office.
Suno sa dating gobernador nga bilang ama it Tibyog Akean, inde nana pwede pabay-an ro alkalde it ibang kabanwahanan nga naghinyo kana ag nagpangayo it proteksyon.
Masubo man para kana nga mismong si incumbent Teodorico Haresco mismo ro naghambae nga bukon raya it miyembro it Tibyog Akean ag posibleng nagakriar it kaugalingon nga grupo rason nga nabuhi it uman ro oposisyon.
Gin-ako ni Miraflores nga nakaangkon it negosasyon sa tunga nanda ni Haresco nga inde pagbutangan it kontra ro mga kandidatong Tibyog Akean apang ko ulihi hay uwa raya nagtuman rason nga sa ulihing oras sa pagfile it candidacy hay gilayon man imaw nga nagdesisyon nga uman nga magsueod sa pulitika ag kontrahon ro incumbent congressman it ikaywang distrito.
Sa pagtapos it certificate of candidacy filing, maging kaengkwentro ni Aklan governor Joen Miraflores si Felicisimo Tanum-Tanum sa pagka-gobernador.
Samtang, si Balete mayor Dexter Calizo ag former Makato mayor Jun Legaspi ro magasambuwa sa pagkabise-gobernador.
Pag-abot mat-a sa unang distrito, maga-engkwentruhanay si former Batan mayor Rodel Ramos ag Jess Marquez nga onga ni Congressman Carlito Marquez sa pagka-kongresista.
