Nagpaandam si Deputy Speaker ag dating Health Secretary Janette Garin kontra sa pag-angot eagi sa school deworming program sa pagkamatay it sangka unga sa Cavite nga owa pa it kumpletong medikal nga imbestigasyon.
Suno kay Garin, pwedeng magtuga it kahadlok sa publiko ro nasambit nga insidente ag makasamad sa deworming program kun indi raya eagi mapaathag it mga awtoridad.
Ginpamilit ni Garin nga eowas sa pangkabilugan ro mga bueong sa deworming ag bukon raya it kilaeang rason it mga grabeng kondisyon kapareho it septic shock. Suno kana dapat man nga usisaon ro iba pang posibleng rason it pagkamatay, kaibahan ro mga dating baeatian ukon underlying condition it unga rason nga gin-engganyo nana ro mga awtoridad nga magpatigayon it maid-id nga imbestigasyon ag autopsy kun pagapasugtan it pamilya.
Ginpamilit pa ni Garin ro importansiya it madasig ag klaru nga komunikasyon halin sa Department of Health agud nga malikawan ro pagkalhit it saea nga impormasyon. Dugang pa nga importante ro deworming program sa ikamayad nga eawas ag tamang pagbahoe it mga unga ag ro pagkabaeaka it publiko hay pwedeng magtuga it pangmabuhayan nga epekto sa pagpatuman it nasambit nga programa.
