KALIBO, Aklan—Importante ro kada boto ag indi dapat nga uyangon.
Raya ro ginpamilit ni Cesar Oczon, Senior Project Officer it Gerry Roxas Foundation rason nga ginapatigayon nanda ro ‘boto ko, ambag ko on wheels’, sangka voters registration campaign kun sa siin nagapangunang katuyuan nga mabuligan ro mga gustong magpa-rehistro para sa nagahilapit nga eleksyon.
Haeos nalibot eon sigon nanda ro bilog nga Western Visayas ag iya sa Kalibo hay ginpatigayon raya sa Kalibo Pilot Elementary School.
Paga-agtunan man sigon nanda ro iba pang banwa sa Aklan.
Kadungan kara, gin engganyo ni Oczon ro mga botante nga maghingabot sa voters’ registration para sa national and local eleksyon sa 2022.
Nagaeaum si Oczon nga madugangan pa ro haeos 2,300 nga mga registrants nga andang nabuligan sa bilog nga Western Visayas maskin nga 500 eamang ro andang target hasta nga matapos ro deadline sa Setyembre 30.
Ginpasaeamatan man nanda ro Commission on Elections ukon Comelec sa pagbulig kanda agud nga maka-deretso eagi ro mga registrants sa andang biometrics.
Samtang, hugut man sigon nanda nga ginapatuman ro health and safety protocols sa andang kampanya.
