KALIBO, Aklan—Nagapatigayon eon ro Kalibo Municipal Police Station it imbestigasyon sa gina-alegar nga hazing sa sangka menor de edad it mga miyembro it sangka ginasugid nga grupo ukon fraternity nga nagresulta sa pagka-ospital it biktima.
Suno kay PCapt Aubrey Ayon, tagapaghambae it Aklan Police Provincial Office ukon APPO nga gin-abisuhan eon nanda si P/Major Frensy Andrade, hepe it Kalibo MPS nga magpatigayon it maid-id nga imbestigasyon bangud sa alegasyon nga natabu ro insidente sa andang hurisdiksyon.
Owa pa sigon naka-abot sa kapulisan ro nasambit nga report, sa baylo hay sa social media pa eamang nanda raya nakita.
Sa pihak kara, ginpasiguro it Aklan PPO nga andang pagapadaeman ro imbestigasyon angot sa insidente ag kon anong grupo ukon fraternity ro nag-recruit sa biktima.
Ginasugid nga maeuya ag may mga gaob nga nag-uli sa andang baeay ro owa ginpangaeanan nga biktima pasado alas-12 it tungang gabi-i bangud sa ginasugid nga pagsakit kana it mga kabarkada.
Nagsunod sigon ro binatilyo sa anang mga kabarkada nga magapamasyar sa Jetty Port sa Brgy. Pook, Kalibo ko nagtaliwan nga adlaw kun sa siin nagpatigayon it hazing .
Bangud sa indi matakuran nga sakit nga nabatyagan, nagpangayo raya sa bulig sa anang mga ginikanan nga madaea sa ospital.
Nagdangop ro pamilya sa LGU-Kalibo para sa bulig pinansiyal sa pagpabueong sa biktima.
Ginapatihan it mga fraternity ag sorority nga ro hazing hay sangka tradisyon para sa andang mga bag-ong recruit sa andang organisasyon ag sa oras nga makapasa sa pagsubok hay magatau raya it identity sa mga miyembro ag makabulig sa pagbilog it karakter it mga gustong magpasakop sa andang grupo.
Angot kara, nag apela it bulig si PCapt Ayon sa mga ginikanan nga bantayan it mayad ro andang mga inunga ag sayuron ro mga barkada nga andang ginasundan agud nga mailikaw sanda sa anuman nga peligro eabi pa ag sunud-sunod ro mga napabalita nga insidente it hazing .
