KALIBO, Aklan—Ginaeauman it Department of Social Welfare and Development Office ukon DSWD provincial link office nga magiging maayos ag madasig eon ro pagpanupod it educational assistance para sa mga pigado nga estudyante.
Suno kay Ms. Beverly Salazar, provincial link it DSWD sa probinsiya it Aklan nga umpisa alas-4 it aga-aga pa eamang hin-aga nga adlaw it sabado hay magapahaum eon sanda sa andang venue sa ABL sports and cultural complex sa capitol site Kalibo agud nga masiguro nga matawhay ro pagpatuman it educational assistance program it ahensiya.
Madumduman ko nagtaliwan nga sabado hay nagkagulo bukon eamang sa Aklan kundi sa haeos bilog nga nasyon matapos nga dagsaon it mga nagahandum nga makabo-oe it financial educational aid ro unang adlaw it pagpanupod kara.
Ginklaru dugang nga indi sanda magabaton it mga walk-in beneficiaries.
Ko nagtaliwan nga mga inadlaw suno kana hay gin-umpisahan eon nanda ro pagpadaea it mga text messages ukon e-mail sa mga nakapa-register sa andang system.
Ginaeauman nga sa masunod nga mga pay-out hay posibleng makaangkon it venue sa una ag ikaywang distrito it probinsiya.
Ginaboebanta nga 1,000 nga mga beneficiaries ro andang mabaton hin-aga nga adlaw.
Bukon it kwalipikado sa nasambit nga programa ro mga benepisyaryo it 4P’s ag mga estudyanteng nakabaton eon it scholarship halin sa gobyerno.
Ro DSWD hay nagtaeana it P500 milyon pesos nga pondo bilang ayuda sa mga pigadong estudyante.
Makabaton it P1,000 ro mga indigent student nga una sa elementarya, P2,000 ro mga una sa high school, P3,000 sa senior high school, ag P4,000 man sa mga college.
