KALIBO, Aklan—Ginakabaeak-an nga mas pang magasadsad sa 60 pesos ro pagbaeayluhan it piso sa kada dolyar.
Raya ro naging panan-awan ni Bombo International Correspondent Greg Aguilar it California, USA bilang sambilog man nga negosyante sa US.
Suno kana nga raya hay bangud sa padayun nga pagpataas it US Federal Reserve it andang interest rates nga nagdugang eon man it 75 basis points.
Tuyo sigon kara nga matapna ro inflation ukon padayun nga pagtaas it mga baeak-eon sa Amerika.
Kada nagapasaka suno kana it interest rates ro FedEx hay mas nga nagabaskog ro dolyar nga naging rason man it paghina it ibang currencies bukon eamang ro peso.
Nasayuran nga nagsarado ro pagbaeayluhan sa 58 pesos kontra sa US dollar kahapon it Miyerkules.
Naeampasan kara ro dating manabang baeayluhan it piso kontra dolyar ko Martes, Sept. 20 nga nagsarado sa P57.48.
Bangud kara, ginpahayag ni Aguilar nga ginaeauman ro pagtaas it presyo it pilang produkto eabi eon ag imported ro kaabuan nga mga raw materials ag krudo sa Pilipinas.
Ginsuhestiyon nana nga sakdagon ro mga lokal nga produkto partikular ro bugas, asukar ag iba pa agud nga indi eon masyadong magsalig sa mga imported products.
Sa pihak nga parte, pabor suno kana ro makarondaya nga sitwasyon sa mga overseas Filipino workers ag Filipino Americans nga manami nga kahigayunan agud nga mag-invest it negosyo ag magbakae it mga properties bangud sa mataas nga balor it dolyar.
Apang raya sigon hay temporaryo eamang ag posibleng sa masunod nga mga binuean hay uman nga magabalik sa normal ro tanan.
