KALIBO, Aklan—Kapareho it ibang mga pumueuyu, nagakasubo man ro lokal nga gobyerno it Kalibo matapos nga owa nakakita it nagakabagay nga lokasyon agud nga obrahon nga horror house.
Madumduman nga naging matsa blockbuster nga pelikula ro gintukod nga horror house it LGU-Kalibo bangud sa haba it pila it mga tawo nga gustong magsueod matapos nga maisipan nanda ro nasambit nga gimik ko nagtaliwan nga mga dinag-on.
Suno kay Carla Suñer-Doromal, Executive Assistant to the Mayor nga may pilang lumang baeay ukon building sigon sanda nga gin-agtunan eakip ro dating funeral homes sa banwa it Kalibo, apang natukiban nga bukon it ideal ro lugar para sa pilang mga bagay nga ginataw-an nanda it konsiderasyon.
Kaibahan kara ro owa it nagakaigo nga parking space ag posibleng makadisturbo sa ibang mga residente.
Gusto kunta nanda ro mga baeay nga sa pagsueod pa eamang hay makapatindog eagi it baeahibo.
Nasayuran nga ko nagtaliwan nga pagtukod it horror house hay gingastusan it LGU ro costume it mga actors ag sound effects agud nga mas makahaeadlok ag mas spooky, kun sa siin nagmadinaeag-on man sanda sa andang misyon nga magpakalhit it kahadlok sa tanan nga mga magasueod bangud nga kaeabanan sa nagtesting hay naghambae nga hinadlukan sa mga karakter sa sueod it horror house.
Samtang, sa makaron hay may sangka kwarto sanda nga gintaeana sa munisipyo nga ginbutangan it dekorasyon nga pang-holloween para sa mga inunga nga magapatigayon it “trick or treat.”
