KALIBO, Aklan — Pagatakayon it natungdan nga komitiba sa Sangguniang Bayan it Kalibo ro ginareklamo nga under construction nga crematorium sa sueod it ginpatindog nga memorial park ukon sementeryo sa Bgy. Mabilo, Kalibo.
Suno kay SB member Ronald Marte nga sa oras nga maka-abot sa konseho ro reklamo it barangay council ag mga pumueuyu it nasambit nga lugar hay posibleng paga-aksyunan raya it Committee on Environment, Committee on Infrastructure, Committee on Economic Enterprise ag Committee on Health.
Pagasayuron sigon nanda kon ano ro mga dapat nga obrahon agud nga mataw-an it sabat ro andang ginareklamo.
Ro crematorium hay mismong ginapanag-iyahan it lokal nga gobyerno it Kalibo.
Nasayuran nga gin-petisyunan it mga residente ro proyekto, kun sa siin, andang gin-insister nga raya hay owa nag-agi sa tamang proseso ag public hearing .
Nabulaga sigon sanda matapos nga masayuran nga may ginpatindog nga crematorium nga makaron hay kapin sa 80 porsiyento eon nga tapos. Mag-eowas kara, eubus sanda nga nagakabaeaka para sa andang ikamayad nga eawas eabi pa ag maeapit raya sa mga panimaeay, eskwelahan ag katangkihan.
Dugang pa nga ro ginpatindog eamang nga crematorium ro ginakontra it mga residente ag bukon it ro mismong sementeryo.
Suhestiyon pa it opisyal nga kunta hay ginbutang ro crematorium sa tunga nga portion it tatlong ektaryang property ag bukon it sa binit it karsada.
Ginrekomenda man nana nga dapat antes ro proyekto hay naghimo it site development plan ro Engineering ag planning office it munisipyo para sa komento it konseho ag iba pang natungdan nga taeatapan.
Nagakinahangean suno kana it Environmental Compliance Certificate (ECC) halin sa Department of Environment and Natural Resources (DENR) antes nga mataw-an it permit to operate ro crematorium.
