Ginatantya nga nagaabot sa masobra 5.4 milyon pesos ro danyos it nag-eontad nga sunog bandang alas-12:08 tungang gabie it Lunes sa Oyo Torong St. Poblacion, Kalibo.
Sa inisyal nga imbestigasyon it Bureau of Fire Protection (BFP) Kalibo, haeos nagkaeasunog ro mga kagamitan sa sueod it daywang gradong baeay nga ginapanag-iyahan it pamilya Tambong.
Maswerte eamang ag naipaguwa it mga raya ro andang daywang ka saeakyan antes pa man tinupok it mabahoe nga kaeayo ro andang propyedad.
Una kara, insigidang nagresponde ro Community Fire Ambulance Group it Poblacion, Kalibo agud nga magbulig sa Bureau of Fire Protection (BFP) Kalibo ag maging ro fire truck it Aklan Filipino Chinese Action Group kon sa siin ginkabuligan nanda nga tapnaon ro kaeayo.
Ginpasaka sigon it BFP sa ikaywang alarma ro insidente kon sa siin nakaresponde man ro fire truck it BFP Numancia.
Sa makaron hay padayon pang ginaimbestigahan eon it BFP Kalibo ro insidente agud nga matumod kon siin gid naghalin ro kaeayo.
Samtang, nagpadumdom man ro BFP Kalibo sa publiko nga maging fire conscious antes nga magkatueog ukon aywanan ro panimaeay nga uwa it tawo.
