KALIBO, Aklan—Ginbuksan eon it Bureau of Fire Protection ukon BFP ro dugang nga fire substation sa Brgy. Balabag sa isla it Boracay.
Raya hay kadungan sa ginapatigayon nga fire safety convention sa nasambit nga isla nga gintambungan it mga regional directors it nagkaeain-eain nga rehiyon sa Pilipinas.
Ro dugang nga taeatapan hay nahamtang sa sangka mall kon siin makabig nga strategic ro location bangud nga dikara haeos kaeabanan nakatindog ro mga maeagkuan nga establisyimento ag negosyo.
May kaangtanan kara, ginpasaeamatan ni Fire Director Louie Puracan ro lokal nga gobyerno it Malay sa suporta sa programa it ahensya kon siin mabahoe nga bulig ro dugang nga fire station eabi eon sa nagaumwad nga turismo sa isla.
Samtang, ginakabig man ni Malay sangguniang bayan member Vicky Aguirre nga welcome development sa pagsueod it panibag-ong administrasyon ro dugang nga fire substation sa isla kon siin ginpromisa nana nga makipag-angot imaw sa pamunuan it Department of the Interior and Local Government partikular kay Secretary Benhur Abalos nga maka-request it dugang nga mga fire trucks.
Sa pihak nga parte, ginpanginbulahan man it Malay Municipal Disaster Risk Reduction Management Office ukon MDRRMO ro BFP Malay bangud sa andang pagtinguha nga makaangkon it dugang nga fire substation sa isla.
Suno kay MDRRMO Malay head Christine Ong, mabahoe nga bulig ro panibag-ong taeatapan bangud nga madugangan man ro mga fire fighters nga magaresponse sa insidente it sunog.
Ginpasiguro man nana ro suporta it MDRRMO sa tanan nga insidente nga pagarespondehan it BFP.
Madumduman nga pilang maeagkuang sunog ro nag-eontad sa isla it Boracay ko nagtaliwan nga buean.
