KALIBO, Aklan—Suportado it grupo it mga senior citizen sa Barangay Badio, Numancia ro petesiyon nga gindihon it mga residente para baeabagan ro crematorium nga planong ipatindog sa andang lugar.
Suno kay Mrs. Erlinda Tamayo, presidente it mga Senior Citizen sa Barangay Badio nga eubos ro andang pagbakaea para sa andang ikaayong eawas ag posibleng maeain nga epekto sa palibot it nasambit nga proyekto.
Masyado eon sigon nga naputos it higko ro andang barangay bangud may tatlo eon rayang sementaryo, slaughter house ag basurahan.
Ginakasubo man sigon nanda ro pag-apruba it lokal nga gobyerno ag barangay sa pihak nga owa raya nagpatigayun it nagakaigo nga konsultasyon para mabuoe ro pulso it publiko.
Nasayuran nga nag-umpisa eon ro konstruksyon it karsada paadto sa eugta nga pagabutangan it crematorium.
