KALIBO, Aklan—Dismayado ro grupong Bantay Bigas sa naging kapabayaan sigon ni Pangueong Ferdinand Marcos Jr sa sektor it agrikultura sa anang ikaywang dag-on sa Malacanang.
Suno kay Cathy Estavillo, tagapaghambae it nasambit nga grupo, imbes nga palig-unon ro lokal nga produksyon it mga mangunguma hay mas ginpaboran ni Marcos ro importation rason nga mismong ro mga manggaranon nga importers ro nagapanipueos.
Sa sueod sigon it daywang dag-on hay napas-eawan ro gobyerno nga resolbahon ro naeksperyensyahang krisis sa pagkaon bangud sa mga saea nga polisiya ag bukon it maayos nga programang pang-agrikultura it administrasyong Marcos.
Ginhalimbawa ni Estavillo ro ginpaguwang Executive Order 62 nga nagapanaba sa taripa sa imported rice nga magiging rason it pagbaha it imported nga bugas sa merkado nga magapalugi sa lokal nga mangunguma bangud sa posibleng magnaba it hasta sa P7 kada kilo it paeay.
Apela it grupo nga himuong prayoridad ro sektor it agrikultura para maabot ro P20 pesos kada kilo nga bugas nga campaign promise ni Marcos.
Nauna eon nga nagpatigayon it rally ro grupo agud nga ipadumdom sa presidente ro anang mga promisa ag iinsister ro kapakanan it mga mangunguma.
