KALIBO, Aklan—Ginsuspendi it Philippine National Police (PNP) ro tanan nga Permit to Carry Firearms outside of Residence (PTCFOR) sa bilog nga nasyon epektibo pasado alas-12:00 it tungang gabi-i ko Setyembre 30 ag magabuhay it hasta alas-7:00 it agahon sa Oktobre 9, 2021.
Suno kay Police Lieutenant Colonel Bernard Ufano it Aklan Police Provincial Office (APPO), tuyo it pagpatuman it gun ban nga masiguro ro kaeuwasan it publiko ag malikawan ro firearm-related incidents sa tyempo it pagdihon it mga kandidato ukon partido it andang Certificates of Candidacy (COC) para sa nagahilapit nga May 9, 2022 national and local elections.
Ro mga miyembro it PNP, Armed Forces of the Philippine (PNP) ag iba pang law enforcement agencies nga naka-official duty ag nakasuksok it agency-prescribed uniform eamang ro ginapasugtan nga magdaea it armas sa mga pampublikong lugar.
Kadungan it pagpatuman it gun ban ro agresibong kampanya it pulisya kontra sa loose firearms ag private armed groups nga posibleng magamit sa eleksyon.
Samtang, owa man it nailistang mga untoward incidents ro mga otoridad sa unang adlaw it COC filing sa nasyon.
