KALIBO, Aklan – – – Naninahan ro sangka 29 anyos nga security guard it Boracay Airport sa Brgy. Caticlan, Malay kat aksidenteng mabarilan it sangka katapo it PNP Aviation Security Group kabie.
Ro biktima hay gin kilaea kay SG Nick Tanan, residente it Tigbawan, Iloilo apang, presenteng naga estar sa Brgy. Unyon, Nabas.
Gina sugid nga nakaangkon it lastro ro biktima sa anang dughan.
Suno kay SPO1 Aven Dela Cruz it Malay PNP Station nga aksidenteng eumopok ro service firearm ni PO2 Benedicto Etrata, 26 anyos ag residente it Brgy. Linabuan Norte, Kalibo.
Sa kasagsagan sigon it pagpatigayun it anti-terror simulation drill ro mga otoridad kabie bandang alas-8:00 ro pang orason sa nasambitan nga airport kat owa na-clear ni Etrata ro anang 9mm pistol service firearm rason nga aksidenteng eumopok.
Nasayuran nga naga ganap nga terorista ro gwardiya sa nasambitan nga drill.
Insigida sigon nga gin respondehan it mga katapo it Malay PNP Station ro insidente ag gin daea ro naninahan nga gwardiya sa Malay District Hospital apang, gin refer sa sangka pribadong ospital sa banwa it Kalibo.
Sa makaron suno kay Dela Cruz hay sa kustodiya eon it otoridad ro armas ni Etrata kamana man nga gis kustodiya anay it anang unit ro nasambitan nga police officer.
