KALIBO, Aklan—Ginreklamo it sangka negosyante ro kilaeang brand it softdrinks matapos raya nga makabakae it expired nanda nga ilimnon.
Gindangop it tagreklamo nga residente it banwa it Lezo sa Bombo Radyo ro nasambit nga reklamo matapos nga owa gin-aksyunan ro anang reklamo.
Suno kana nga maskin nga indi eon i-refund ro kwarta nga anang ginbayad para sa nasambit nga energy drink nga ginbakae basta nga bayluhan raya, apang owa natabu ag puro promisa eamang.
Sa anang pag-usisa, expired eon sigon ko Oktubre 10, 2021 samtang ro iba pa sa nasambit nga produkto hay November 2 matapos nga gindaea raya sa anang grocery store ko Oktubre 13.
Matsa pagpang-loko man sigon ro ginhimo kana bangud nga ro expired nga mga produkto hay ginbutang sa tunga.
Mag-eowas kara, overpriced pa suno kana ro pag-deliver kana bangud nga imbes nga 700 pesos per case ro andang kasugtanan, ginsukot imaw it 1,700 pesos it ahente para sa daywang kaha nga ginbakae nga sobra it 300 pesos.
Sambilog pa sa andang nangawahan hay owa imaw gin-isyuhan it resibo.
Sa mayad nga swerte suno kana ag na-check eagi nana ro produkto nga owa pa raya nabaligya sa anang mga bumaeakae.
Ginlaygay pa nana sa kaparehong mga negosyante ag konsumidor nga pirmeng i-check ro expiry date it anuman nga ginabakae nga produkto agud nga indi makatuga sa kahalitan sa ikamayad nga eawas it mga konsumidor.
Angot kara, ginhana it Bombo news team nga makipag-angot sa kompaniya apang nagpamalibad ro mga raya nga magtau it anuman nga pahayag sa nasambit nga reklamo.
Suno sa sales manager it soft drink company nga magapangayo anay sanda it clearance sa andang regional office.
Makaron pa eamang sigon nanda nasayuran ro nasambit nga reklamo.
Ginpaathag dugang nga antes nga magguwa sa andang planta ro mga produkto hay gina double check ag posibleng ro problema hay sa andang mga distributor eon.
