Ginpahayag it Department of Social Welfare and Development (DSWD) nga haeos 978,290 kwalipikadong miyembro it Social Security System (SSS) nga kaibahan sa low-income sector ro ginaeauman nga makabaton sa masunod nga domingo it andang unang P2,000 ayuda sa idaeum it Unified Package for Livelihood, Industry, Food, and Transport (UPLIFT) Assistance.
Suno sa DSWD, naisumite eon it SSS sa LandBank ro listahan it mga benepisyaryo para sa pagproseso it ayuda. Ro unang batch hay ginaeakipan it mga miyembrong madinaeag-on nga na-match sa Community-Based Monitoring System (CBMS) it Philippine Statistics Authority (PSA).
Sakop it Group 3 ro ginaboeobanta nga 1.5 milyong low-income SSS members nga magabaton it P2,000 kada buean umpisa Hulyo hasta Disyembre 2026, basta nga kwalipikado ag may rehistradong disbursement account.
Gin-engganyo it DSWD ro iba pang kwalipikadong miyembro it SSS nga insigidang magbukas ag mag-enroll it andang disbursement accounts agud nga maeakip sa masunod nga payout. Ginpasiguro man it ahensya nga maskin sa Agosto igaproseso ro unang payout, makabaton sa gihapon ro mga benepisyaryo it ayuda para sa buean it Hulyo.
Samtang, nagapadayun sa gihapon ro pagpanupod it ayuda para sa iba pang benepisyaryo it UPLIFT, kaiahan ro mga miyembro it Pantawid Pamilyang Pilipino Program (4Ps), Walang Gutom Program (WGP), ag mga pobre ag near-poor nga mga pumueuyu nga natumod sa 2024 CBMS.
