KALIBO, Aklan—Haeos 100 porsiyento eon it mga pulis sa Aklan ro bakunado kontra COVID-19.
Raya ro ginpahayag ni P/Col. Ramir Perlas, Provincial Director it Aklan Police Provincial Office ukon APPO.
Kaabuan suno kanda hay naka-first dose pa eamang it bakuna gamit ro AstraZeneca.
Mabahoe man ro pagpasaeamat it opisyal sa provincial government bangud sa pagtaeana it bakuna para sa tanan nga mga kapulisan sa probinsiya.
Gindugang pa ni Col. Perlas nga mabahoe nga bagay sa andang trabaho bilang frontliners nga maging bakunado.
Samtang, may patakaran man sigon sanda nga ginapatuman engkaso nga tamaan it COVID-19 ro sangka pulis nga naka deploy sa sangka police station agud nga malikawan ro pagtaeapnan.
Suno kana nga may ginpahaum sanda nga team halin sa mobile force nga igabueos sa mga gin-isolate nga PNP personnel agud nga indi maapektuhan ag magadere-deretso ro andang serbisyo.
Insigida man nga ginmandu ro pag disincect sa lugar.
Sa pihak nga parte, nag apela man imaw sa publiko nga maglikaw sa mga lugar nga ginbutangan it kordon it pulis engkaso nga makaangkon it kinagamo partikular ro hostage taking incident.
Kinahangean suno kay Col. Perlas nga isipon ro kaeowasan imbes nga magtinguha nga makabo-oe it video gamit ro cellphone eabi eon ro mga owa nakasayod it media protocol.
Raya hay kasunod it hostage incident sa Caloocan ko nagtaliwan nga adlaw matapos nga bumuhos ro maabu nga usyusero.
