KALIBO, Aklan—Nagpangibabaw ro higante it banwa it Ibajay matapos nga nakuhit ro unang pwesto sa 11 nga mga nagpabonggahan nga mga banwa nga nagpasakop sa higante contest and parade nga sambilog sa mga ginbantayan nga aktibidad sa nagapadayon nga weeklong celebration it Kalibo Sr. Sto. Niño Ati-Atihan Festival 2023.
Naangkon it mga raya ro premyo nga kapin sa P150,000 pesos.
Nagpangaywa ro munisipalidad it Balete nga may premyo nga P110,000 pesos; 3rd place ro lokal nga gobyerno it New Washington nga napasaalima man ro kapin sa P90,000 pesos; pang ap-at nga pwesto ro banwa it Tangalan nga may P80,000 pesos ag panglimang pwesto ro munisipalidad it Numancia nga nakaangkon it premyo nga P70,000 pesos.
Ro iba pang banwa nga nagpasakop sa nasambit nga higante contest hay ro banwa it Banga, Batan, Kalibo, Makato, Malinao ag Nabas.
Ro nasambit nga aktibidad hay nag-umpisa bandang ala-una it hapon kun sa siin ro parada hay naghalin sa ABL Sports and Cultural Complex paadto sa Pastrana park.
Ro tema makaron nga festival hay Tribal Ati bilang pagbalik sa face to face it ginakabig nga Mother of All Philippine Festival.
Ro dag-unan nga higante contest and parade hay napaiway man it kapin sa daywang dag-on bangud sa pandemya.
Ro ginakaeangkagan nga pagbalik it “in person” nga Ati-atihan festival hay gindagsa it maabong tawo makaron nga dag-on.
Samtang sa pihak nga parte, eubus man ro kalipay ag pagpasaeamat ni Aklan Governor Joen Miraflores sa mga LGU’s nga nagpartisipar sa nasambit nga aktibidad.
Ginpasiguro kara nga pagapabaskugon pa raya ag confident imaw nga ro 17 ka banwa hay makapasakop eon it andang higante sa dag-on 2024 nga Ati-Atihan Festival.
