Gintaeana it International Criminal Court (ICC) ro pangaywang status conference sa kasong ginapangatubang ni dating Pangueong Rodrigo Duterte angot it crimes against humanity sigon sa anang kampanya kontra droga.
Pagahiwaton ro pagpamati sa Hunyo 23, 2026, halin 10:00 a.m. hasta 12:00 p.m., suno sa Trial Chamber III.
Pagatalakayon sa pagpamati ro limang nagapangunang isyu, kaibahan ro deadline it obserbasyon sa Expert Panel Report, protocol sa confidential information, limitasyon sa Prosecution Trial Brief, iskedyul it masunod nga status conferences, ag regulasyon sa public statements it mga counsel.
Una eon nga ginpatigayon ro unang status conference ku Mayo 27, 2026, kun siin nadesideran ro pagkinahangean it pangaywang pagpupueong para sa mas detalyadong pagtalakay sa mga proseso it kaso.
Sa pagpahaom, prosekusyon eamang ro nagsumite it rekomendasyon samtang uwa it dugang nga sabat halin sa depensa ag Registry.
Ginklaro it ICC nga pampubliko ro pagpamati apang posible rayang saraduhon sa pilang parte kun kunahangean para sa seguridad ag proteksyon it mga testigo.
Ginkumpirma man nga indi magtambong si Duterte matapos nana nga i-waive ro anang kinamatarong nga mag-atubang sa nasambit nga pagpamati.
