KALIBO, Aklan—Limitado ro mga tawuhan it Municipal Disaster Risk and Reduction Management Office ukon MDRRMO it LGU-kalibo nga iga-deploy sa selebrasyon it kapiestahan ni san juan de bautista sa hunyo 24.
Suno kay Terrence June Toriano, hepe it MDRRO-Kalibo nga masyado sanda nga masako makaron sa pag-transport sa mga locally standed individuals ag mga returning OFWs, kun sa siin ro andang mga tawuhan hay pirmeng nakasuksok it personal protective equipment ukon PPE.
Apang ginklaru kara nga engkaso nga may mga insidente nga matabu hay maga-responde man sanda.
Ginpaathag ni toriano nga bangud nga nakapaidaeum eon ro aklan sa modified general community quarantine ukon MGCQ hay ginapasugtan eon ro mga pumueuuyu nga makapaligos sa mga baybayon, apang nagapabilin nga bawae ro mga hapi-hapi ag pakikipag-inuman agud nga malikawan ro pagtumpok-tumpok it mga tawo.
Nagpaandam man raya sa mga nagapanag-iya it mga resorts nga magapanabat sa oras nga indi mapatuman ro social distancing ag pagsuksok it face mask ro andang mga customer.
Kabulig ro mga barangay tanod, hugut nga maga-ronda ro mga kapulisan sa mga beach resorts sa bilog nga aklan sa selebrasyon it san juan de bautista.
Nagpaandam pa imaw nga mabudlay ro madisgrasya makaron nga may krisis.
Samtang, gindugang pa ni toriano nga sa makaron hay nagahueat pa sanda it dugang nga impormasyon halin sa regional anti inter agency task force sa ginapatigayon nga contact tracing sa mga posibleng nakasalamuha it personnel it BFP-region 6 nga infected it covid-19 nga nagsueod sa isla it boracay umpisa hunyo 11 hasta 14.
