KALIBO, Aklan–Mabahoe ro pagpasaeamat it aklan police provincial office ukon APPO bangud nga generally peaceful ro unang daywang adlaw it Simbang Gabi sa probinsiya it Aklan.
Suno kay P/Capt. Aubrey Ayon, tagapaghambae it APPO nga owa it anuman nga nairerport nga untoward incident sa pag-umpisa it simbang gabi kahapon ag ginaeauman nga magapabilin ro kalinong hasta sa Paskwa.
Sa pihak suno kana it pagdagsa it mga katoliko sa haeos 22 nga simbahan nga andang ginabantayan sa bilog nga probinsiya sa pag-umpisa it simbang gabi hay owa sanda it nailista nga kinagamo.
Sa pihak kara, bilang kaparte it andang Oplan Ligtas Paskuhan, ginpahayag ni Ayon nga magapabilin nga alerto ro kapulisam sa mga simbahan, karsadahon ag transport terminals eabi pa ag ginaeauman nga maga-abu ro mga biyahero nga maga-agi sa probinsiya samtang nagahilapit ro paskwa.
Ginpasiguro man it pamunuan it APPO nga bastante ro numero it mga pulis nga nakakalhit sa mga vital installations mag-eowas pa sa mga pulis nga nagapatigayon it foot patrol.
Kaibahan suno kana it mga pulis nga nakadeploy sa mga simbahan hay ro mga katapo it MDRRMO para sa anumang emergency responses.
Target sigon nanda nga maabot ro zero major incident hasta sa pagtapos it yuletide season.
