KALIBO, Aklan—Ginaselebrar makaron nga adlaw ro ika-246 nga anibersaryo it Independence Day it Amerika kadungan it Filipino-American Friendship Day.
Suno kay Bombo International Correspondent Pinoy Gonzales it Texas nga nag-umpisa ro deklarasyon it US Independence ko Hulyo 4, 1776.
Raya hay matapos nga eubusan nga mataw-an it kahilwayan ro Amerika halin sa mother country kara nga England.
Ro US Independence Day suno kana hay sambilog sa pinakamabahoe nga selebrasyon sa andang nasyon kung siin gin-deklara ro petsa 4 it Hulyo bilang National holiday.
Kaeabanan sigon sa mga pumueoyo hay nagapatigayun it pagkinasadya kaeakip ro pagpahaum it mga pagkaon, ilimnon ag fireworks display.
Ro mga opisyal man it gobyerno hay naga-adto sa monumento para dumdumon ro andang baganihan nga may mabahoe nga kontribusyon sa naangkon nga kahilwayan it Amerika.
Kadungan kara hay ginataw-an man it mabahoe nga importansya ro Filipino-American Friendship Day bilang pagkilaea sa manami ag mapag-on nga relasyon it daywang ka mga nasyon.
