KALIBO, Aklan—Agud nga padayon nga makilaea ro isla it Boracay sa bilog nga kalibutan, ginsuhestyon ni Ambassador Agus Widjojo it Indonesia nga pabaskugon ro promotion it isla pinaagi sa social media.
Sa raya nga tikang suno kana hay makapabaskog raya sa industriya it turismo.
Kinahang-ean sigon nga makaangkon it positibong feedback ro mga social media influencers agud nga mas maabo ro maengganyo nga dumadayo sa Boracay kapin eon ro mga uwa pa nakatabok hay makaangkon ro mga raya it interes agud nga makabisita sa isla.
Ginpahayag dugang ni Indonesian ambassador nga bukon eamang it andang kaugalingon ro andang ginapresentar kundi ro andang bilog nga nasyon rason nga makabulig sanda sa pagpromote it Boracay sa andang mga nasakupan apang, kinahang-ean ro manami ag positibong reviews agud nga padayon nga magabalik ro mga turista kapin eon makaron nga summer season.
Nasayuran nga kaeabanan sa mga talakayan hay ginpresenta sa Diplomatic and Business Forum nga ginpatigayon sa Belmont Hotel sa isla it Boracay.
Mag-eowas sa Indonesian ambassador, ro iba pang mga diplomat nga nag-abot hay sanday Megawati DatoPaduka Haji Manan it Brunei; Dato Abdul Malik Melvin Castelino it Malaysia; Lai Thai Binh it Vietnam; Imtiaz Ahmad Kazi it Pakistan; Sadre Alam it India, ag Wallace Minn-Gan Chow it Taiwan.
