KALIBO, Aklan–May ginadudahan eun nga suspek ro pamilya it gintakawan nga panimaeay kung sa siin naga-abot sa kabilugang 580,000 pesos ro natigayon nga matakaw it nagsueod nga manakaw sa Margarita St. Barangay Poblacion, Banga.
Sa pihak kara, ginpahayag it tag-iya it nasambit nga baeay nga anda eun lang anay nga pagahueaton ro magiging resulta it imbestigasyon it mga katapo it kapulisan.
Nagapati man sanda nga kakilaea eamang nanda ro nagpanakaw bangud imposible sigon nga indi maalarma ro andang kaeapit baeay ukon ro andang alagang ayam kung may ibang nagsueod sa andang panimaeay.
Gindugang pa kara nga may andang ginabayaran nga care taker sa andang baeay agud nga magpanglimpyo ag magpakaon it andang alagang ayam.
Nasayuran nga pabalik- balik sa Metro Manila ro mag-asawa bangud sa andang trabaho.
Pilang adlaw antes ro Paskwa hay nagpadueong sanda sa Manila kun sa siin sa andang pagbalik hay andang ginkakibot ro pagkaduea it andang pilang ka mga alahas, ag perfume.
Nagkaealhit man sigon ro andang mga eambong ag iba pang mga kagamitan sa anda mismong kwarto.
Apang ro andang pwertahan hay owa sigon it senyalis nga gingamitan it puwersa ukon ginsamad para nga makasueod.
Sa makarun hay haom sigon sanda nga magtao it pabuya sa magabalik ukon makaturo sa kung sin-o man ro may kahimuon it nasambitan nga pagpanakaw.
