Sa pihak it manami nga gin obra ni President Duterte sa mga miyembro it Philippine National Police (PNP) nga ginpataasan ro andang suweldo ko 2016, maabu sa gihapon sa mga raya ro naga-obra it kalokohan.
Indi makuntento sa nabaton nga suweldo ag nagahandum pa it kwarta hasta nga magsueod sa pagpangotong , hulidap ag pagpanakaw.
Grabe eon ro mga nagakatabu sa mga pulis makaron ag nagakadapat nga ireporma.
May una pa man nga mga mayad nga pulis ga ginatuman ro andang ginsumpaan nga serbisyo apang mas maabu ro naga-obra it kaeainan nga nagapanaba sa imahe it PNP.
Owa eon sanda ginasaligan it mga pumueuyu.
Umpisa nga mauso ro e-sabong, maabu eon nga pulis ro naeakot sa nasambit nga bisyo.
Mag-eowas nga maabu nga pulis ro naadik ag nagk-utang it minilyon bangud sa e-sabong, maabu man nga gina-obra nga pangabuhian ro pag-hulidap sa mga sabungero mismo.
Nakita it mga kawatang pulis nga puwedeng ma-kwartahan ro mga sabungero.
Ko Marso 19, napueong nga pulis sa Bacolor, Pampanga ro gin-akusahang nag-hulidap sa 10 nga sabungero matapos nga i-raid nanda ro sangka tupadahan sa nasambit nga lugar.
Ginbo-oe sa mga sabungero ro P379,000 pesos.
Ro mga pulis hay mga miyembro it drug enforcement and intelligence unit.
Ginsibak eon ro 10 pulis, kaibahan ro police director.
Sa Laguna, daywang pulis ro ginsibak sa puwesto matapos nga akusahan it pagkidnap sa an-um nga sabungeros ag gintamnan pa it illegal nga droga.
Mag-eowas sa pagkidnap ag pagtanum it droga, gintakaw pa it daywang pulis ro P300,000 nga cash, alahas ag cell phones it mga sabungeros.
Sa Caloocan, an-um nga pulis ro ginsibak bangud sa pagpanakaw it P14,000 pesos sa vendor ko nagtaliwan nga Marso 27.
Mga pulis man ro ginaturo nga nagkidnap sa 30 nga mga sabungeros nga naduea ko Disyembre.
Hasta sa makaron, owa pa nakita ro mga sabungeros ag ginadudaha nga patay eon.
Grabeng reporma eon ro kinahangean sa PNP.
Kun indi magapatigayon it reporma, magabagsak ro pambansang pulisya bangud sa mga maeain nga pulis.
Salbaron ro PNP.
