KALIBO, Aklan—Gin engganyo it Jugas barangay council sa banwa it New Washington ro andang mga kasimaryo ag kaiping nga mga kabarangayan nga boluntaryong mag-donate it andang dugo nga makabulig sa mga nagakinahangean sa probinsiya it Aklan.
Suno kay Barangay Captain Thelma Pronton nga target nanda ro sang porsiyento it populasyon it andang barangay nga makatau it andang dugo sa pagahiwaton nga blood letting activity sa Agosto 28, Biyernes nga adlaw.
Imbes suno kana nga sa barangay hall pagahiwaton ro event hay plano nanda nga daehon raya sa covered court it housing project it National Housing Authority (NHA) sa nasambit nga lugar agud nga mapatuman ro social distancing bilang pagsunod sa minimum health protocol it Department of Health.
Ko nagtaliwan nga dag-on suno kana hay nakatipon sanda it 32 nga bags it dugo rason nga makabig nga madinaeag-on ro andang blood letting campaign ag ginaeauman nga matabu raya it uman makaron nga dag-on.
Ro nasambit nga event hay suportado it Deparment of Health, Philippine Red Cross Aklan chapter ag Bombo Radyo Kalibo.
Nauna eon nga ginpahayag it PRC nga ro mga pasyenteng nagakinahangean kara hay ro may grabeng kakueangan it dugo, may leukemia, mga naga-unga nga nakaangkon it komplikasyon, naaksidente ag nagakinahangean it transplant procedure.
Ro mga gustong magdonate it andang dugo hay kinahangean nga may timbang nga 110 pounds ukon 50 kilo nga naga edad it 18 hasta 60 anyos ukon 65 anyos para sa mga regular nga blood donor.
Ro mga naga edad man it 16 hasta 17 anyos hay dapat nga may permiso sa ginikanan ukon guardian consent ag may healthy nga pang-eawason.
Ro mga temporaryo nga indi pwedeng magtau it dugo hay ro mga nabdos, may eagnat, nakainom it aeak sa sueod it 12 hasta 24 oras, may tattoo sa anumang parte it eawas ukon nagpatuhog it dueunggan nga owa pa it sang dag-on kamana man ro mga bag-ong na-operahan.
Ro mga permanente nga indi puwedeng magdonar it dugo hay ro mga may kanser, grabeng sakit sa baga, may Hepatitis B ag C, may HIV infections/AIDS ukon Sexually Transmitted Diseases (STD), high-risk occupation kapareho it mga prostitutes, nakikipaghieawas sa maabung partner, indi mapaathag nga pagbawas it limang kilo nga timbang sa sueod it an-um nga buean ag sobrang adik sa aeak ukon ginatawag nga chronic alcoholism.
Samtang, ro mga successful blood donor hay pagataw-an it souvenir dugong bombo t-shirt halin sa Bombo Radyo Philippines ag Star FM.
