Nagsaka eon sa P2.9 billion ro gintuga nga kahalitan it El Niño phenomenon sa Rehiyon 6.
Ginpahayag ni Department of Agriculture 6, Regional Executive Director Dennis Arpia nga kaibahan sa mga apektadong pananum hay ro paeay ag mais.
Apektado it mahabang tag-init ro 84,181 nga mangunguma ag 122, 702 nga ektarya it pananum nga nagresulta sa pagdeklara it State of Calamity it 74 nga LGU sa rehiyon.
Bilang sabat sa epekto it mahabang tag-init, nagbilog it El Nino action plan ro DA para mapataas ag mapanami ro produksyon sa agrikultura eabi eon sa mga lugar nga bukon it masyadong apektado.
Kaibahan sa nasambit nga action plan ro pag-activate it Disaster Task Force para masiguro nga nagahueag ro mga response effort, kaibahan ro pagproduce ag pagpanupod it mga dekalidad nga binhi.
Nag-abot man sa P15.20 million nga certified rice seed ag P22.24 million para sa hybrid seed ro ginatanyag it ahensiya.
Nagtau man sa mga mangunguma it mga gamit sa sapat, planting materials, pesticide ag biological control agents.
Sa pihak it ng naeksperyensiyahan nga pagsubok, nagaeaum ro ahensya nga makabangon ro mga apektadong mangunguma pinaagi sa padayun nga pagbueuligan.
