Ginapa-imbestigahan eon sa Senado ro rason ag kahalitan nga gintuga it mga nagtaliwan nga bagyo ag padayun nga epekto it habagat sa nasyon.
Suno kay Senate President Pro Tempore Tito Sotto III, tuyo it imbestigasyon nga mapabaskog ro disaster mitigation effort it nasyon sa tiempo it kalamidad.
May pagkinahangean sigon nga mausisa ro kapag-on it mga public infrastructure sa tunga it mga grabeng bagyo ag habagat nga nagpanaeasa sa nasyon.
Sa Resolution No. 631 ni Senador Sotto, gintumod ro sunud-sunod nga bagyo ag habagat ko Agosto nga nagtuga it maeapnagon nga baha, suspensyon it klase, pagka-stranded it mga commuter, ag pagsarado it mga negosyo, nga nag-abot sa P5.1-billion ro kahalitan.
Nagakabaeaka man ro senador sa report it Department of Health nga masobra sa 5,000 eon ro kaso it leptospirosis, samtang masobra sa 300 nga iba pa ro namatay makaron nga dag-on bangud sa nasambit nga sakit tuga it pagbaha bangud sa bagyo ag habagat.
