KALIBO, Aklan—Nag-abot sa masobra sa P365,000 pesos ro nailistang kahalitan sa sunog nga natabu sa sangka panimaeay nga himo sa light materials sa Mabini St. Kalibo, bandang alas-2, hapon it Biyernes, Abril 12.
Suno kay FO2 Baldomero Imperial, imbestigador it Bureau of Fire Protection ukon BFP-Kalibo nga umabot sa unang alarma ro sunog kun sa siin daywang fire trucks halin sa andang taeatapan ro rumesponde agud nga paengon ro sunog.
Sa inisyal nga imbestigasyon, nag-umpisa ro sunog sa kwarto it baeay kun sa siin ginatumod pa kon ano ro ignition source sa sueod nga posibleng ginhalinan it kaeayo.
Masobra sa sang oras ro ginpatigayon nga pagtapna it mga bumbero antes gindeklara ro fire out.
Sa makaron hay nagapadayun pa ro imbestigasyon it BFP sa natabu nga insidente.
Mag-eowas sa nasambit nga baeay nga totally burned, partially damaged man ro kaiping kara nga commercial building.
Uman nga nagpadumdum si FO2 Imperial sa mga pumeuyu nga pirmeng maging aware sa fire safety agud nga makalikaw sa sunog.
Makaron nga buean it Abril hay nakalista eon ro BFP Kalibo it tatlong insidente it sunog.
