KALIBO, Aklan—Nakapahaum eon ro Kalibo international airport sa pagbuhos it mga pasahero sa paeuparan sa maabot nga pista minatay.
Suno kay Engr. John William Fuerte, manager it Civil Aviation Authority of the Philippines ukon CAAP-Aklan nga nagplastar sanda it assistance ukon malasakit desk agud nga mabuligan ro kada pasahero sa andang problema sa airport.
Raya hay sa idaeum suno kana it Oplan Undas nga nag-umpisa ko Martes ag magatapos sa Nobyembre 3.
Sa atubang it amat-amat nga pagbalik it pre-pandemic nga flight schedule hay parehong preparado ro andang tawuhan ag ro kagamitan sa paeuparan agud nga maging maayos ro handling it mga flight.
Sa makaron hay naga-average sa pito ro andang domestic flights adlaw-adlaw samtang ap-at nga beses sa sang domingo ro international flight halin sa Incheon, Korea.
Ginaeauman nga sa buean it Disyembre hay posibleng madugangan ro mga international flight eabi eon ro nagahalin sa Thailand.
Sa pihak nga parte, nakadepende suno sa volume it pasahero kon magadugang it flight ro mga airline companies para sa undas.
Owa man suno kana it anuman nga pagbag-o sa ginapatuman nga protocol sa sueod it paeuparan.
