KALIBO, Aklan—Nag-apela si Kalibo Mayor Emerson Lachica sa mga pumueoyo nga sundon ag intindihon ro naga-iral nga laye halin kat ginpaidaeom sa enhanced community quarantine ro bilog nga probinsya it Aklan.
Raya hay matapos nga nataeopangdan ro pag-abo it mga behikulo nga nagasueod sa banwa it Kalibo considering nga ginsuspinde ro public transportation base sa ginpaguwa nga executive order ni Aklan Governor Florencio Miraflores.
Suno kana, kinahang-ean nana ro kooperasyon it tanan bangud nga ro banwa it Kalibo hay nakalista eon it tatlo nga mga nagpositibo sa 2019 coronavirus disease ukon COVID-19.
Sa ginpatigayon nga press conference it lokal nga gobyerno it Kalibo, may gintaeana nga daywang ka tricycle ro tagsa ka punong barangay agud nga i-service sa mga constituents nga nagapamaeak-eon sa banwa it Kalibo apang kinahang-ean nga daywang ka pasahero eamang ro sakay kara.
Ro natabo sigon hay ginbutangan it private nga karatola ro tricycle agud nga makasueod kon sa siin patago ro mga raya nga nagapamasahero.
Sa hugot nga pagbantay it mga kapulisan, maabo ro franchise tricycle nga nadakpan sa banwa it Kalibo kon sa siin impound ro mga raya sa taeatapan it munisipyo.
Sa makaron ro Kalibo hay may 12 eon lang nga mga ginakabig nga Person’s Under Monitoring ukon PUM’s.
Samtang, kapin sa 21,956 ka households ro uman nga pagaayudahan it LGU engkaso nga mapaeawig pa ro naga-iral nga enhanced community quarantine sa bilog nga probinsya it Aklan.
