KALIBO, Aklan—Nagpaguwa it executive order si Kalibo Mayor Emerson Lachica angot sa temporaryong pagsuspinde it klase umpisa adlaw it Huwebes sa mga eskwelahan nga maeapit sa Governor Corazon Legaspi-Cabagnot Memorial Training Center sa Brgy. Old Buswang, Kalibo.
Ro nasambit nga mandu hay tuga it pag-quarantine sa 11 Chinese tourists bangud sa posibilidad nga exposure it mga raya sa novel coronavirus ukon N-cov.
Presente sandang nagapabilin sa nasambit nga hotel nga ginapanag-iyahan it gobyerno para sa ginahimo nga medical observation sa sueod it incubation period nga 14 diyas.
Ro mga eskwelahan nga ginsuspinde anay ro klase hay ro Regional Science High School for Region VI, Saint Gabriel College, Buswang Old-Bachao Sur Elementary School ag Starglow Center for Academic and Arts.
Suno kay Mayor Lachica nga ro nasambit nga tikang hay bilang precautionary measure bangud nga “human transmitted disease” sigon ro novel coronavirus nga madali raya nga matapnan ukon maisaylo sa ibang tawo.
Padayun man sigon ro andang koordinasyon sa Department of Health (DoH) ag Provincial Health Office (PHO)-Aklan, kun sa siin, ginkumpirmang nagapabilin nga n-CoV free ro Aklan bagay nga owa it dapat nga ikabaeaka ro publiko.
Ro nasambit nga mga dumueuong hay naghalin sa Hubei province nga ginaeakipan it pitong adult ag ap-at nga unga.
Nauna eon nga ginpahayag ni Dr. Cornelio Cuachon, Jr. it PHO-Aklan nga ap-at sa mga raya hay may close contact sa pasyente sa Hong Kong nga andang nakasakay sa eroplano nga ginasugid nga infected it coronavirus.
