KALIBO, Aklan—Nagapangatubang makaron sa kakueangan sa personnel ro Kalibo Municipal Police Station bangud sa pag-pull out it napueo sa andang miyembro ag nagbalik sa andang tagsa ka lugar partikular sa probinsya it Capiz, Iloilo ag Negros.
Suno kay P/Major Willian Aguirre, deputy chief of police it Kalibo Municipal Police Station, ko adlaw it Biyernes nag-abot ro order it napueo ka mga PNP personnel bilang pagtuman sa localization program it Philippine National Police.
Mag-eowas kara, inde magnaba sa 20 ka mga personnel ro nakataeana nga mag-schooling rason nga madugangan pa gid ro kakueangan sa numero it personnel sa Kalibo PNP Station.
Sa pihak it kakueangan sa personnel, ginpasiguro ni P/Major Aguirre nga uwa it mabihangan nga trabo bangud nga sanda mismo ro magaadjust agud nga mapun-an ro pwesto ag matrabaho ro gin-aywanan it mga ginpull-out nga personnel.
Makikipag-angot sigon sanda sa iba pang force multipliers agud nga mapabaskog pa gid ro andang pwersa bangud ro banwa it Kalibo hay sentro it komersyo, kalakalan ag iba sa bilog nga probinsya it Aklan.
Naga-eaum sanda nga mapun-an sa masunod nga buean ro kakueangan it mga personnel sa nasambit nga taeatapan it pulisya.
Nasayuran nga ro katuyuan it nasambit nga programa hay mapabaskog ro andang moral ag welfare bangud nga manami gid sa pamatyagan kon nagaserbisyo ro mga kapulisan sa kaugalingon nga lugar.
