KALIBO, Aklan–Ginpakigbahin ni Sangguniang Bayan member Ronald Marte nga ginahueat eon lang nanda ro implementasyon agud nga daeayon eon nga maumpisahan ro konstruksyon it Kalibo Public Market.
Suno sa opisyal nga owa it problema sa andang loan sa Development Bank of the Philippines (DBP) bangud gin-aprubahan raya it Sangguniang Bayan.
Base sigon sa andang pag-istorya ni Mayor Juris Sucro hay posibleng ikonsidera kara ro phase by phase nga pag-ubra it tindahan.
Pila sigon sa andang ginaproblemahan hay ro lugar nga temporaryong pagahalinan it mga vendor samtang ginapatigayun ro konstruksyon.
Aminado si Marte nga kinahang-ean eon nga magtukod it panibag-ong merkado publiko sa guwa it Barangay Poblacion.
Dapat sigon nga may parking space raya ag mas mabahoe ro lugar.
Sa makaron hay ginahueat eon lang nanda ro pinal nga desisyon ag ro desinyo it bag-ong tindahan.
