KALIBO, Aklan—Mas pang ginpabaskog it Police Regional Office 6 ukon PRO-6 ro andang pagtinguha agud nga matapna ro loose firearms sa bilog nga Western Visayas.
Suno kay P/Lt. Col. Arnel Solis, tagapaghambae it Police Regional Office 6 nga naga-doble kayod makaron ro tanan nga mga line units ag municipal police stations agud nga matapna ro pagkalhit it owa naka-rehistro nga mga armas.
Target kara ro mga gun holders nga napas-eawan nga ma-renew ro nagakaigo nga dokumento kapareho it permits to carry firearms outside residence ag lisensiya .
Laygay nanda sa mga gun owners nga owa nakapa-renew it andang dokumento nga i-surender anay ro andang mga armas sa kapulisan para sa safekeeping agud nga malikawan nga makasuhan.
Sa kamatuoran suno kana ko buean it setyembre hay nakatipon ro PRO 6 it 289 nga nagkaeain-eain nga armas ag 36 nga explosives nga ginpatago sa nagkaeain-eain nga units bangud sa expired nga lisensiya .
Sa pihak nga parte, sa bilog man nga buean it setyembre, ginpahayag ni Solis nga madinaeag-on sanda nga nakapatigayon it 27 nga search warrants ag nakakumpiska it 34 nga nagkaeain-eain nga firearms ag 2 nga explosives, ag naka-aresto it 20 nga indibidwal sa bilog nga region 6 .
Gindugang pa ni Solis nga sangka operasyon pinaagi sa gahum it search warrant ro ginpatigayon it kapulisan sa banwa it Ibajay adlaw it Miyerkules kun sa siin nakakumpiska it sangka unit it .45 kalibre nga baril, may magazine ag kargado it pitong bala halin sa sangka indibidwal .
