KALIBO, Aklan—May posibilidad nga kapas-eawan sa paghiguma ro sambilog sa mga rason kon ham-an nga nagdesisyong magbigti ro sangka 21-anyos nga soltero sa andang baeay sa Barangay Rosario, Malinao ko Lunes nga adlaw.
Ro biktimang si alyas Jecks, residente it nasambit nga lugar hay nakit-an it anang ina nga nakabitin ag owa eon it kabuhi.
Suno kay Christina Millan nga pinaagi sa cellphone it anang unga hay natukiban nanda ro posibleng rason it anang pagpakamatay.
Ginapatihan nga bangud sa planong pakikipag-break it anang nobya nga nakarelasyon sa sueod it limang buean kamana man ro pag-apply kara nga magtrabaho abroad ro rason it pag angkon nana it depresyon.
Naha-istorya man sigon it biktima ro kasakit nga anang nabatyagan sa anang magueang.
Samtang, haeos indi makapati ro pamilya nga maobra raya it biktima bangud eamang sa paghigugma.
Apang suno sa ina nga masyado gid man nga ma-sekreto ro anang unga bangud nga mahipuson raya nga klase it tawo.
Sa pihak kara, mabahoe man ro andang pagkanugon bangud nga mabahoe raya nga bulig sa andang pamilya.
Nasayuran si alyas Jecks hay presenteng nagatrabaho sa banwa it Kalibo.
Mag-eowas nga masakit sa baeatyagon ro pagkaduea it unga, nagapangatubang man sanda sa kalisod bangud sa kawad-an it pinansiyal sa pagpa-eubong kara.
