KALIBO, Aklan—Ginaboeobanta nga kapin sa 300 hasta 500 nga mga gun owners ro maka-avail sa ginpatigayon nga daywang adlaw nga License to Own and Possess Firearm ukon LTOPF Caravan it Regional Civil Security Unit ukon RCSU-6 nga nag-umpisa kahapon nga adlaw, Agosto 13 ag magatapos makaron nga adlaw Agosto 14.
Suno kay P/SSgt. Leonelyn Artes, tagapaghambae it Aklan Police Provincial Office ukon APPO nga tuyo kara nga engganyuhon ro mga nagapanag-iya it baril nga magbo-oe it lisensya para sa gina-angkon nga baril.
Suno kana nga kalitan ro makarondaya nga pribilihiyo bangud nga sang beses eamang raya nga ginapatigayon it RCSU 6 sa sueod it sang dag-on ag kon amat ro pag-proseso kara hay kinahangean nga himuon sa siyudad it Iloilo.
Kaibahan sa proseso ro pagpaidaeum sa drug test, neuro test ag kinahangean man it police clearance.
Ro venue it LTOPF Caravan hay sa Magsaysay park Kalibo.
Pwedeng mag-avail sa LTOPF caravan ro mga gun enthusiast, mga miyembro it ibang organisasyon, mga opisyal ag empleyado it mga ahensiya it gobyerno nga may unrenewed firearms.
