KALIBO, Aklan—Uman nga nagpaandam ro Police Regional Office 6 sa mga nagabuyot it baril nga may expired nga lisensiya nga nakataeana nga magpaguwa it search warrants kontra kanda engkaso nga mapas-eawan nga magpa-renew.
Nagpanawagan si PRO-6 spokesperson Major Mary Grace Borio sa tanan nga mga firearm holders nga may expired nga lisensiya nga mas pang ginpabaskog makaron ro kampanya it pulisya kontra sa loose firearms .
Nagapakita sa records halin sa Regional Civil Security Unit 6 nga ‘as of March 10’, may una nga 30,838 nga mga baril nga owa na-renew ro andang lisensiya nga makabig nga loose firearms sa bilog nga Western Visayas.
Sa nasambit nga numero, ro probinsiya it Iloilo ro may pinakamataas nga numero it unrenewed firearms nga nakalista it 6,427.
Raya hay ginsundan it Negros Occidental nga may 6,257; Bacolod City nga may 5,171; Iloilo City nga may 5,063; Capiz nga may 3,688; Aklan nga may 1,873; Antique nga may una nga 1,811, ag Guimaras nga may 548.
Gindugang pa ni Borio nga ginmanduan eon ro tanan nga mga hepe it pulisya ag iba pang units nga pabaskugon ro andang kampanya kontra sa mga gun owners nga mapas-eawan nga ma-renew ro andang mga lisensiya.
Nagapadayun suno kana ro “Oplan Katok” program it PNP kun sa siin magapanuktok sanda sa baeay it mga gun holders agud nga ipadumdum ro andang obligasyon nga magpa-renew.
