KALIBO, Aklan—Gindesisyunan it Election Registration Board ukon ERB nga iga-deactivate halin sa andang listahan ro pangaean it kapin sa 4,500 nga mga botante matapos nga mapas-eawan nga makaboto it daywang sunud-sunod nga eleksyon.
Suno kay Comelec election officer IV Atty. Christian Itulid it Comelec Kalibo nga raya hay kasunod it ginpatigayon nga ERB hearing ko nagtaliwan nga Abril 15.
Ginpaathag ni Atty. Itulid nga otomatiko nga ginakakas ro pangaean it mga botante halin sa andang official records sa oras nga indi makaboto it daywang magkasunod nga eleksyon.
Sa pihak kara, ro mga pangaean nga na- deactivated hay pwede pa nga maka-file para sa reactivation agud nga uman nga maeakip sa listahan it mga active voters it banwa it Kalibo.
Padayun suno kana ro andang pagpadaea makaron it mga sueat sa mga botante nga na-deactivate agud nga maka-agto sa andang opisina para sa reactivation eon man it andang records.
Mag-eowas kara, magapadaea man sanda it kopya it listahan it mga botante sa mga kabarangayan agud nga matan-aw kon pwede pa sanda nga makaboto sa masunod nga eleksyon.
