KALIBO, Aklan — Temporaryong nakahilway ro mag-asawang katutubong Ati nga naaresto bangud sa pagdaea it kapin sa P65,000 nga pekeng P1,000 peso bill ko Enero 16, ika-limang adlaw it selebrasyon it Kalibo Sr. Sto. Niño Ati-Atihan Festival 2026.
Suno kay P/Capt. Jovier Ponghon, deputy chief of police it Kalibo Municipal Police Station, owa nakahingabot sa gintaeana nga oras ro pagpasaka it kaso kontra sa nasambit nga mga indibidwal bangud sa ginatawag nga reglementary period.
Sambilog sa mga rason kon ham-an nga owa nakahingabot sa nasambit nga oras ro pagpasaka it kaso hay ro mga kinahangeanon nga proseso ag legal nga dokumento, partikular ro sertipikasyon it Bangko Sentral ng Pilipinas nga counterfeit ro mga narekober nga kwarta.
Ginaboeobanta nga magabuhay ro proseso it 40 diyas. Sa oras nga mapamatud-an nga peke ro nasambit nga mga kwarta, dikara eon pagapasakaan it kaso ro mag-asawa nga tubong Brgy. Cabugao, Batan apang temporaryong naga-istar sa Brgy. Man-up, Altavas.
Nabaeabagan it mga pulis nga naka-assign sa screening area sa C. Laserna St., Kalibo ro mag-asawa bandang alas-2:45 it hapon, kun sa siin, boluntaryo sigon nga ginbuksan it babaye ro anang sling bag nga may sueod nga maabu nga P1,000 peso bill.
Sa interview it Bombo Radyo kay alyas Eric, natipon nanda ro pekeng kwarta halin sa paagaw nga ginhimo it anang amo sa sangka construction site sa banwa it Altavas ko nagtaliwan nga Christmas party.
Owa sigon nana nasayuran nga gindaea it anang misis ro pekeng kwarta sa Kalibo nga ro anda eamang nga tuyo hay makisadya kunta sa festival.
Dugang pa kara nga owa pa man nanda raya hagamit kat mabaeabagan it mga awtoridad.
Gina-imbestigahan pa it kapulisan ag BSP ro ginhalinan it pekeng kwarta ag kun may kaangtanan ro mag-asawang katutubo sa naarestong most wanted person sa Aklan nga may kaso man angot sa paggamit it pekeng kwarta.
Sa pag umpisa it Ati-Atihan fever sa Aklan, sangka tag-ana it sari-sari store sa Batan ag sangka nagabaligya it euy-a ro nabiktima it mga indibidwal nga nagagamit it pekeng P1,000 peso bill.
Nauna eon nga gin-abiso it BSP nga ipatuman ro “Feel, Look, Tilt” method agud nga mabuligan ro publiko nga matumod kon peke ro ginabaton nga kwarta.
