KALIBO, Aklan — Haum eon ro Western Visayas ag ginaeauman nga makaangkon it mayad nga hampang kontra sa mga bigating player halin sa National Capital Region, Southern Tagalog ag Central Visayas para sa andang pagsabak sa nagahilapit nga 64th Palarong Pambansa nga magabukas sa Hulyo 9 hasta 16 sa Cebu City.
Suno kay Mr. Hernani Escullar Jr., spokesman it Department of Education (DepEd) Region 6 nga ginaboeobanta nga kapin sa 933 nga mga athleta, coaches, assistant coaches, ag chaperones ro magabiyahe sa nasambit nga siyudad sa masunod nga domingo.
Sa nasambit nga numero, 601 ro atleta nga ginaeakipan it 214 sa elementarya, 346 ro secondary ag 41 ro para sa paragames.
Magkaseparado sigon nga magabiyahe ro mga delegado halin sa Panay Island ag Guimaras sa Hulyo 6 nga maga-agi sa Iloilo to Cebu samtang ro Negros Occidental hay maga-agi sa San Carlos City.
Sa masunod nga domingo hay magabiyahe eon ro advance party agud nga magtan-aw sa billeting quarters nga nakataeana para sa Western Visayas sa Guadalupe Elementary School sa V. Rama Avenue sa Cebu City.
Kumpara ko nagtaliwan nga dag-on, owa eon sigon it may ginpatigayon nga pre-qualifying match makaron nga dag-on sa team sports samtang sa individual sports hay nagpaidaeum ro mga raya sa qualifying standards ukon dapat nga makasueod sa top 24.
Handum man makaron it DepEd Region 6 nga kon indi man maeabawan ro overtall champion nga NCR hay mapabilin it Western Visayas ro andang ikaywang pwesto nga naangkon ko 2023 Palarong Pambansa.
