KALIBO, Aklan — May person of interest eon ro kapulisan sa nagbuno-patay sa sangka 41-anyos nga eaeaki bandang alas-12:40 it aga-aga sa Brgy. Guinbalewan, New Washington, Aklan.
Suno kay Patrolman John Adam Cerezo it New Washington Police Station nga nagapadayun ro andang ginahimo nga imbestigasyon sa natabu nga pagbuno sa biktimang si Solidum Iray, residente it Sitio Guintampaan sa nasambit nga barangay.
Natabu ro krimen sa madueum nga portion sa nalikod nga parte it multi-purpose pavement kon sa siin hay may ginapatigayon nga binayle.
Base sa report, nakaangkon sigon it inaway sa nasambit nga lugar hasta nga ko ulihi hay nagdaeaeagan eon ro mga tawo matapos nga matumba ro biktima nga nag-angkon it tama it pagbuno sa waea nga parte it anang tiyan .
Insigida raya nga gindaea it mga rumespondeng pulis sa provincial hospital, apang namatay samtang nga ginabueong bandang alas-2:30 it aga-aga.
