KALIBO, Aklan — Padayun ro pagtaas it kaso it dengue sa probinsiya it Aklan.
Sa panibag-ong datos nga ginpaguwa it Provincial Health Office, umpisa Enero 1 hasta Agosto 31, 2024 hay nagsaka eon sa 2,035 ro numero it kaso it dengue nga may 325.6% nga attack rate ag nagapabilin nga ap-at ro namatay.
Dugang pa nga 14 nga banwa ro nakitaan it pagtaas it kaso it dengue halin sa kabilugan nga 17 nga banwa sa probinsiya.
Kapin sa 16 nga banwa ag masobra sa 80 nga barangay ro may clustering ukon pagtuhaw it tatlo ukon masobra pa nga kaso it sakit sa sueod it nagtaliwan nga tatlong domingo.
Sa sueod it sang domingo, umpisa Agosto 24 hasta 31, nakaangkon it 215 nga bag-ong kaso.
Ro Malay ro naka-rehistro it pinakamataas nga numero it dengue cases nga may 394; Kalibo nga may 315; Nabas nga may 145; Libacao nga may 138 ag Numancia nga may 134.
Agud nga indi eon magtaas pa ro numero it kaso ag pagkamatay bangud sa dengue sa probinsiya, gin-engganyo it PHO ro publiko nga maging “aware” sa mga sintomas it nasambit nga sakit nga ginaeakipan it gulping pagtaas it eagnat nga nagabuhay it daywa hasta pitong adlaw, sakit sa kasukasuan, pagpang-euya, rashes sa panit, sakit sa tiyan, pagdugo it ilong kon ro eagnat hay naga-umpisa eon nga magtahaw, pagsuka it kulay kape, maitom nga kulay it higku, nabudlayan sa pagginhawa ag pagsakit it likod it mga mata.
Indi sigon raya pagbalewalaon ag insigidang mag-agto sa pinakamaeapit nga ospital agud nga indi eon mag-grabe ro sakit.
Gin-abisuhan man ro tanan nga himuon ro 4S Drive it Department of Health.
