KALIBO, Aklan — Kasong homicide ro ginapahaum makaron it kapulisan nga igapasaka kontra sa gin-aresto nga suspek matapos nga makaangkon it mga mabakod nga ebidensiya may kaangtanan sa pagkapatay sa sangka 23-anyos nga babaye nga nasapwan nga naga-eutaw-eutaw ag owa eon it kabuhi sa kanae it irigasyon sa Brgy. Mataphao, New Washington bandang alas-5:00 it aga-aga ko Huwebes nga adlaw.
Insigidang gin-aresto ro suspek nga si Rockson Roque alyas Bombay, residente it Sitio Tabiling sa nasambit nga barangay ag presenteng nakakulong sa lock-up cell it New Washington Police Station.
Sa makaron hay padayun pa nga ginatumod kon ro biktima hay ginhimuslan agud nga igasunod ro pagpasaka it kasong rape.
Nauna eon nga ginpahayag ni P/Staff Sgt. John Rey Montuerto it Aklan Provincial Crime Laboratory nga igapaidaeum sa vaginal swabbing ro biktima agud nga makabo-oe it spermatozoa specimen, apang medyu mabudlay suno kana bangud nga nababad sa tubi ro eawas it biktima.
Sa pihak nga parte, sa interview it Bombo Radyo, ginpahayag ni Jelly Zaulda, manghud it biktimang si Jennifer Zaulda, residente man it nasambit nga lugar nga antes nanda nga gin-aywan ro anang magueang bandang alas-4:00 it aga-aga nga nagapungko sa kilid it irigasyon hay si Bombay ro anang kaibahan.
Nagpamalibad sigon nga magsunod kanda ro anang magueang sakay sa motorsiklo ni Sangguniang Kabataan ukon SK chairman John Kent Reynaldo matapos nga makaangkon sanda it owa pagka-ilintindihan .
Naakig sigon ro anang magueang matapos nga owa imaw nag-ea-ong nga nagpanaw sa birthday party kaibahan ro SK chairman paagto sa banwa it banga agud nga magbakae it sigarilyo .
Ginatukob man sigon imaw it konsensiya matapos nga gin-aywan ro anang magueang sa euyo it suspek ag owa ginpilit nga mag-uli eon sa andang baeay.
Nasayuran nga ro biktima hay hubeas nga nasapwan nga owa eon it kabuhi .
