NEWS Analysis– Napamatud-an nga eakot sa illegal drug activities ro 18 nga opisyal it Philippine National Police suno sa pag-imbestiga nga ginpatigayon it National Police Commission Ad Hoc Advisory Group.
Nag-resign ro 18 nga opisyal ag insigida man raya nga ginbaton ni President Ferdinand Marcos Jr. ko Martes.
Nauna eon nga ginpahayag ni Marcos sa anang 2nd SONA nga pagabatunon nana ro pag resign it 18 nga opisyal.
Ro 18 hay kaibahan sa 953 nga pulis nga ginpadihon it courtesy resignation ko nagtaliwan nga dag-on sa mandu ni DILG secretary Benhur Abalos.
Ro pangutana makaron, pagapasugtan eon lang baea nga basta nga magresign ro 18 nga opisyal?
Eakot sanda sa illegal drugs ag pagapa-resaynon eang.
Bukon it mayad nga halimbawa kun makarondaya ro matabu.
Indi eon mahadlok ro mga pulis nga mag obra it maeain bangud nga ginapa-resign eang sa puwesto.
Dapat nga mabulok sa presuhan ro mga opisyal nga eakot sa drug trade.
Nag-ugat ro lahat kat makit-an sa lending office ni MSgt Rodolfo Mayo ko Oct. 8, 2022 ro 990 kilos it shabu nga nagabalor it 6.7 billion pesos.
Gin-aresto si Mayo apang ginpahilway man.
Nasayuran nga nabawasan it 42 kilos ro shabu nga nakumpiska kay Mayo.
Ginsibak eon sa puwesto ro mga opisyal it Philippine Drug Enforcement Group (PDEG) ag mga tawuhan nanda nga nag-raid sa office ni Mayo bangud sa “cover up”.
Bukon it raya ro unang kahigayunan nga ro mga pulis hay naeakot sa illegal drugs.
Maabu eon ro nadakpan kaibahan ro mga ahente it Philippine Drug Enforcement Agency (PDEA) nga eakot sa drug recycling.
Ro mga nakumpiskang droga hay ginabalik sa kalye.
Padayun ag pauman-uman nga ginakitaan it mga scalawag nga pulis.
Indi masolbar ro problema sa illegal nga droga sa nasyon hasta nga may mga pulis nga nagaprotekta.
Ro mga pulis nga dapat nga magadakop sa mga drug traffickers hay sanda pa ro nagatabon sa mga raya.
Kasuhan ag itapok sa presuhan ro mga police officials nga napamatud-an nga eakot sa illegal nga droga.
Indi pagpatawaron ro mga saeot.
