KALIBO, Aklan—Kasunod it paghaeuga it Qatar sa COVID-19 restrictions, maabu nga mga Pilipino sa nasambit nga nasyon ro mas ginpili nga magpatigayon it Eid’l Adha holiday sa guwa partikular sa mga nagapanguang beach destinations idtu.
Raya ro ginpahayag ni Bombo International Correspondent Drew Baldomero Geronimo it Qatar.
Suno kana nga umpisa kahapon it Martes hasta sa Sabado hay kaeabanan nga owa it sueod sa trabaho sa mga pribadong kompaniya ag taeatapan it gobyerno.
Manami sigon nga kahigayunan ro maeawig nga holiday agud nga maka-bonding ro mga amigo ag pamilya.
May ibang grupo man sigon it mga Pinoy nga nagapatigayon it mga parties bangud nga ro Eid’l Adha hay katumbas it selebrasyon it New Year sa Pilipinas.
Sa kamatuoran suno kana hay nagselebrar man ro embahada it pilipinas sa Qatar it Independence Day kadungan it holiday.
Sa pihak nga parte, gindugang pa ni Geronimo nga bongga ro preparasyon makaron nga dag-on it gobyerno it Qatar sa Eid’l Adha.
Nagpahaum sigon sanda it mga fireworks display sa nagkaeain-eain nga lugar it nasyon.
Mag-eowas kara, masako man ro mga pumueuyu idtu sa pagpreparar it mga manami ag maabu nga mga pagkaon.
Naging madahog sigon ro pagbaligya it mga karnero, apang ro mga indi makasarang nga magbakae hay nakuntento eon lang sa pagkatay it mga kanding.
Nagatau man ro mga Muslim it hadiya ukon regalo samtang ro mga manggaranon hay nagapalitson it karnero agud nga ipakaon sa mga nagakinahangean.
