KALIBO, Aklan—Mabatyagan eon it mga senior citizen ag persons with disabilities ro pagtaas sa dikswento nga pwede nanda nga ma-avail kada buean sa mga grocery ag iba pang nagapangunang baeak-eon.
Raya ro ginbalita ni Kalibo sangguniang bayan member Augusto Tolentino, chairman it committee on senior citizen ag persons with disabilities.
Ginpataas ro discount it mga senior citizen sa “basic goods” it 125 pesos kada buean halin sa dating weekly discount nga 65 pesos.
Suno kay Tolentino nga raya hay mabahoe nga bagay sa mga natungdan.
Kaibahan sa mga items nga sakop it discount hay ro prime commodities kapareho it bugas, mais, tinapay, karne, isda, manok, itlog, mantika, asukar, tinuea, prutas, sibuyas, bawang, toilet soap, papel, school supplies, batteries ag gatas mag-eowas sa medical grade milk.
Kaibahan man ro manufactured goods kapareho it processed meat, sardinas, ag corned beef nga bukon it premium brand.
Sakop man it diskwento ro basic construction supplies, kapareho it semento, hollow blocks, ag electrical supplies, pati light bulbs.
Kaibahan man kara ro mga household liquefied petroleum gas ag kerosene.
Kamana man ro fertilizer, pesticides, ag herbicides.
Dugang pa it opisyal nga ro special discount para sa nasambit nga mga item hay dapat nga ipatuman para sa ekslusibong paggamit it senior citizens ag PWDs nga owa it probisyon nga pasugtan ro anumang unused amount nga magamit sa masunod nga domingo.
Ginklaru pa kara nga ro discount hay iba pa halin sa 20% statutory discount nga ginatau sa idaeum it Republic Act No. 9994 ukon Expanded Senior Citizens Act of 2010, kamana man sa idaeum it RA 10754, ukon Act Expanding the Benefits and Privileges of PWDs.
