KALIBO, Aklan—Naga-abot eon sa 51,437 halin sa masobra sa 165,000 nga kwalipikadong benepisyaryo sa Western Visayas ro nataw-an it ayuda hasta makaron nga buean it Agosto ukon katumbas it haeos 60 porsiyentong payout rate.
Raya hay sa idaeum it Unified Package for Livelihood, Industry, Food, and Transport ukon UPLIFT Assistance.
Suno kay Therese Fely Legaste, Regional Information Officer it Department of Social Welfare and Development ukon DSWD Region 6 nga padayun pa ro distribusyon sa nagkaeain-eain nga probinsiya sa Region 6 agud nga maabot ro nabilin pa nga benepisyaryo.
Nagapatigayon man sigon it special payout schedules ro mga lokal nga gobyerno para sa mga kwalipikadong owa nakabo-oe it ayuda sa nakataeanang payout.
Tuyo it UPLIFT program nga makabulig sa mga pamilyang pigado ag maeapit sa poverty line, kamana man nga suportahan ro sektor it pagkaon, enerhiya ag transportasyon sa tunga it padayun nga pagtaas it gaeastuson.
Nasayuran nga masobra sa 5.39 million nga pobre, near-poor, ag low-income households ro makabenepisyo halin sa UPLIFT Assistance it administrasyong Marcos sa bilog nga nasyon.
