Indi dapat pagpapanaugan it penalidad ro mga empleyado nga indi makasueod sa trabaho bangud sa baha ukon maeain nga paniempo.
Raya ro nakabutang sa Labor Advisory No. 14, Series of 2026 nga ginpaguwa it Department of Labor and Employment ukon DOLE.
Ginpirmahan ni Labor Secretary Francis Tolentino ro nasambit nga advisory.
Raya ro updated guidelines angot sa pagsuspinde it trabaho sa pribado nga sektor kun may mabaskog nga uean, kun may pagbaha, ag kun may iba pa nga emerhensya.
Suno sa ahensya, owa it dapat nga administrative sanction sa mga trabahador sa pribado nga sektor nga indi makasueod sa trabaho bangud sa delikado nga kondisyon it paniempo.
Sa idaeum it nasambit nga abiso, gin-engganyo it DOLE ro mga pribado nga kompanya nga magsuspinde it trabaho kon kinahangean, bilang kaparte it andang management prerogative ag sa koordinasyon sa mga safety officer, agud masiguro ro kamaeayran ag kaeuwasan it mga empleyado.
Angot man sa sweldo, ginpaathag it DOLE nga nagapadayon ro “no work, no pay” nga patakaran kon suspindihon ro trabaho.
Apang mahimo gihapon makabaton it sweldo ro mga trabahador kon may mas paborable nga polisiya ro kompanya, may collective bargaining agreement, ukon kun gamiton nanda ro andang natipon nga leave credits.
Para sa mga empleyado nga nakasueod gihapon sa trabaho bisan maeain ro paniempo, suno sa DOLE, ro mga nakatrabaho it masobra sa an-um nga oras hay may kinamatarong sa full regular daily wage.
Ro mga nakatrabaho man nga owa nag-eampas sa an-um nga oras hay makabaton it katumbas nga parte it andang regular nga sweldo.
Gina-engganyo it DOLE ro mga employer ag workplace safety committee sa bilog nga nasyon nga magpatuman it klaro nga mga protocol kon maeain ro paniempo, agud maprotektahan ro mga trabahador kontra sa mga peligro sa trabaho ag mapreserbar ro andang mga kinamatarong.
